Infoasturies 11/05/2011
La recién presentación de la plataforma llocal Conceyu d’Unidá Popular de Xixón y de la so candidatura pa les próximes eleiciones municipales paez ser que sorprendió a munchos, nunos casos pa bien y n’otros pa mal, cuando realmente nun ye más qu’un pasu lóxicu y coherente dientro d’una dinámica socio-política que vien dende hai dellos años.
Énte la evidencia del estáu de les coses cada vegada más llamentable que sufrimos n’Asturies, lo mesmo que de la incapacidá esistente pa xenerar rempuestes coleutives con un mínimu de permanencia nel tiempu y de trescendencia na sociedá, la “unidá” vino convirtiéndose nos caberos tiempos nel “significante vacíu”, que diría Ernesto Laclau, col que cada vez más persones s’identifiquen pero que cada sector entiende d’una manera bien distinta. El casu ye que foi xenerándose un clima cada vez más favorable a la xuntanza de les fuercies de la esquierda tresformadora y/o del nacionalismu asturianu, y que la mayor parte de les organizaciones con mayor o menor sinceridá según los casos tomaron nota d’esta demanda que vien dende les sos propies bases sociales.
Por embargu nos atopamos en munches ocasiones colos mesmos problemes de siempres: l’ausencia d’un vocabulariu y d’una gramática políticos comunes, el sectarismu tribal, el vanguardismu, los personalismos, ya inclusive la falta d’ética política.
Asumiendo la murnia realidá de que nun hai más cera que la qu’ambura, y de qu’un procesu unitariu sinceru y realmente integrador tiense que basar nel abandonu de determinaes pretensiones y na reconocencia d’una variedá de suxetos sociales a articular dende embaxo, dende l’ámbitu d’Andecha Astur viénose impulsando una dinámica d’unidá d’aición dende la base que sirvió cuando menos pa dir desbloquiando parcialmente determinaos escenarios, yá que de lo que se trata nun ye de que teamos toos d’alcuerdu nun 100% sinón de dir xenerando espacios d’alcuentru y d’aición coleutiva pa trabayar aquellos oxetivos políticos que primeramente yá compartimos.
Una espresión anque poco afortunada na so resultancia d’esta dinámica foi la campaña SOS Asturies nel añu 2009, que finó naufragando por mor de los enfrentamientos ente’l PCPE y la Coordinadora Antifacista d’Asturies, enfrentamientos que por desgracia me correspondió conocer y vivir bien de cerca.
Y averándonos a los caberos acontecimientos, de resultes per un lláu, del calter restrictivu que tuvo’l procesu d’unidá ente los partíos UNA y BA, y de les carencies que presenta’l productu resultante, y per otru llau, de la dinámica d’unidá d’aición na que distintos sectores tábamos converxendo dempués de coincidir en munches ocasiones nes mesmes barricaes, acabó remaneciendo Conceyu Abiertu colos oxetivos d’articular el espaciu de la esquierda soberanista, anguaño socialmente fragmentáu, y de siguir afondando na unidá d’aición dende una perspeutiva municipalista.
Conceyu Abiertu a lo llargo d’estos meses vien estructurándose como una rede de plataformes asambleries a nivel de conceyu, yá que nesti País llegamos a tal situación de desaniciu global qu’un proyeutu d’aición coleutiva como’l que representa la nuesa propuesta de reconstruición nacional por fuercia tien que caracterizase por una determinada flexibilidá y por dir a la gueta de nuevos modelos d’aición, pedagoxía y comunicación socio-políticos.
Y si Conceyu Abiertu adoptó xurídicamente a nivel nacional la formula d’un partíu políticu, cuando lo ideal sedría que namás esistiera como conxuntu d’agrupaciones d’eleutores, camudándose-y el nome a una entidá hai tiempu llegalizada, foi namás pa evitar determináu tipu de xugaes y sabotaxes por parte precisamente de sectores que siendo nel planu teóricu relativamente allegaos dacuando paez que na so practica real nun tienen más oxetivu que’l desaniciar al soberanismu de posiciones socialistes.
Nun pretendemos ser la solución a nengún de los males estructurales de la sociedá asturiana, sinón que partimos precisamente de la base de que les varites máxiques nun esisten, y que determinaos alderiques o actuaciones polítiques nun tienen nin van tener una determinada proyeición y/o eficacia social si primero nun somos quien a ellaborar una metodoloxía política con capacidá de xenerar nuevos escenarios más allá del presente cuadru de desmovilización y frustración.
Y precisamente dientro d’esta dinámica d’unidá d’aición dende los conceyos la plataforma llocal Conceyu Abiertu por Xixón converxió col heteroxéneu movimientu de la Mesa de la Unidá de la Esquierda de Xixón, nel cual tan presentes munchos compañeros de barricada. Esta converxencia de cara a estes eleiciones adopta la forma xurídica d’una coalición de Conceyu Abiertu colos partíos políticos que sofiten la Mesa: la organización Izquierda Anticapitalista, heredera de la tradición del POUM, y el Frente de la Izquierda, plataforma qu’agrupa al sector comunista que nos caberos años enfrentóse a la direición d’IU n’Asturies.
Esta alianza nun ye más qu’un asitiamientu deriváu de tolo anterior, yá que se trata d’una converxencia táctica a nivel llocal d’alcuerdu cola realidá especifica de Xixón y coherente col plantegamientu de la unidá d’aición dende los conceyos, na que non solamente Conceyu Abiertu caltien la so independencia ideolóxica ya estratéxica sinón qu’inclusive’l CUPX como proyeutu especificu asume una explicita categorización nacional del País asturianu, y amás concretamente nel primer puntu del so programa reivindica “una democracia participativa que permita a los ciudadanos y ciudadanes decidir que modelu políticu y social quieren pa Xixón y Asturies, nel exerciciu de la so soberanía popular”.
El fechu de que Conceyu Abiertu fuera quien a entendese cola Mesa de la Unidá de la Esquierda amuesa bien claro la bona voluntá y l’esfuerzu de munchos na unidá d’aición.
Y si UNA y BA, que nel so momentu participaron nos conceyos de la Mesa de la Unidá de la Esquierda, nun tán presentes nel CUPX foi cenciellamente porque a la fin nun quixeron tar. Qu’eso quede claro, nel CUPX non hebo nengún vetu a BA y a UNA, al revés de lo qu’ellos ficieron con Conceyu Abiertu en Villaviciosa, onde tres dos meses de negociación de la nueche al día espulsósenos.
Y volviendo a Xixón, na actual coxuntura, el CUPX de momentu ta amosando col so bon facer el ser una ferramienta válida equi y agora pa dar dellos pasos na reconstruición de les ferramientes d’intervención coleutiva que precisamos pa la defensa de los nuesos intereses como Pueblu Trabayador Asturianu. Namás pero tampoco nada menos.
